Agjencia ndërkombëtare e lajmeve, Bloomberg thotë se autoritetet shqiptare kanë nisur hetimet për skandalin e mbetjeve toksike që u nisën nga Porti i Durrësit me destinacion Tajlandën. Bloomberg ka kërkuar informacion pranë autoriteve shqiptare që kanë thënë se pluhuri i dyshuar toksik u nis pa autorizim nga Shqipëria. "Zyrtarët shqiptarë thonë se po hetojnë se si 800 ton mbetje industriale të dyshuara të rrezikshme u transportuan nga porti i saj pa autorizim, me destinacion Azinë Juglindore, pasi ngarkesa e dyshuar do të duhej të kthehej mbrapsht”, shkruan Bloomberg. Ndërkohë, anija Moller-Maersk që transportonte disa nga ngarkesat e dyshuara i shkarkoi kontejnerët në Singapor gjatë fundjavës, pasi fillimisht kishte lundruar pranë portit përpara se të kthehej për t'u ankoruar në një lëvizje që Bloomberg e konsideron të pazakontë.