Ministri i Punëve të Jashtme të Greqisë, Niko Dendias ndodhet në Tiranë për një vizitë zyrtare. Për të siguruar mbarëvajtjen e vizitës së tij, e cila vjen në një kohë kur zhvillimet mes dy vendeve janë në nivele të larta edhe për cështjet e detit, Policia e Shtetit ka blinduar perimetrin e Ministrisë së Jashtme, pasi Dendias aty nis takimet e tij të para. Një protestë e nisur në ambientet në hyrje të Ministrisë së Jashtme ka bërë që situata të tensionohet. Ashtu siç e kishte paralajmëruar Partia për drejtësi, integrim dhe unitet ka nisur të protestojë. Ndërkohë që policia ka shoqëruar edhe drejtuesin e lëvizjes VV në Tiranë, Bojken Abazi. Kreu i PDIU-së, Shpëtim Idrizi sqaroi për mediat se Policia nuk ka dhënë leje për protestën dhe protestuesit e PDIU-së janë rrethuar nga forcat policore. Idrizi e ka cilësuar një shtetrrethim të vërtetë nga Policia shqiptare, teksa shton se kishin bërë kërkesë për protestë paqësore me rastin e vizitën së ministrit të jashtëm grek për t’i kujtuar çështjen çame, kërkimin e faljes, pronat, sigurisht edhe për kufijtë detarë. Në fakt leja për protestë nuk është dhënë dhe sikurse e pranoi vetë Idrizi është refuzuar me justifikimin e COVID-19.