Një shqiptar që akuzohet për një vrasje të kryer në Tiranë plot 22 vjet më parë dhe që gjatë kësaj kohe fshihej në Greqi më në fund është arrestuar dhe ekstraduar tashmë drejt Shqipërisë. Arben Muca fshihej prej vitesh në shtetin fqinj, por pas shkëmbimit të informacionit ai nuk mundi të gëzojë më shumë liri. Në kuadër të bashkëpunimit mes Zyrës Qendrore Kombëtare Interpol Tirana dhe Interpol Athinës, pas shkëmbimeve të vazhdueshme të informacioneve të grumbulluara nga Departamenti i Policisë Kriminale për vendndodhjen e një të kërkuari për vrasje, i cili fshihej në territorin grek, Policia greke ka finalizuar kapjen dhe arrestimin e shtetasit shqiptar me qëllim ekstradimin e tij në Shqipëri. Ky shtetas, në vitin 1998 në Kombinat, Tiranë, në rrugën "Kelmendi", në afërsi të një bilardoje ka vrarë me armë zjarri shtetasin M. T. Gjykata e Tiranës e ka dënuar me 23 vjet burg, për veprat penale "Vrasja me paramendim” e kryer në bashkëpunim dhe "Armëmbajtja pa leje". Zyra Qendrore Kombëtare Interpol Tirana po vijon procedurat e mëtejshme për ekstradimin e shtetasit Arben Muça drejt vendit tonë