Cdo ditë e më shumë numri i shqiptarëve të përfshirë në trafikun e drogës është në rritje, ndërsa edhe punonjësit e policisë po zhvillojnë hetime më të thelluara dhe angazhimi në këtë fushë bëhet gjithnjë e më maksimal. Efektivët e policisë Lezhë, kanë goditur një tjetër rast kultivimi dhe trafikimi të lëndëve narkotike këtë të mërkurë, ndërsa 2 persona përfunduan në pranga dhe një tjetër u shpall në kërkim. Në kuadër të operacionit ‘Adriatiku’ u arrestuan shtetasit Roland Muzhaqi dhe Dritan Llani, ndërsa në kërkim është shpallur Sokol Kurti. Këta shtetas u kapën në flagrancë gjatë operacionit, në oborrin e banesës së shtetasit Roland Muzhaqi, i cili do të blinte lëndën narkotike që e kishin transportuar nga Kruja, Dritani dhe Sokoli. Ky i fundit ka mundur të largohet nga vendngjarja në momentin e ndërhyrjes së Policisë. Sipas policisë, Muzhaqi do ta shiste lëndën narkotike në doza në qarkun e Lezhës. Gjatë operacionit policor, u sekuestruan 31 kilogramë kanabis sativa, 2 automjete, 2 aparate celulare dhe targa automjetesh. Këto materiale do ti kalojnë prokurorisë së Rrethit Gjyqësor Kurbin, për veprën penale ”Prodhimi dhe shitje të lëndëve narkotike”, kryer në bashkëpunim. Ndërkohë, vijon puna nga ana e policisë për goditjen e rasteve të ngjashme dhe vënien e këtyre autorëve përpara drejtësisë.