Polonia, e cila e mori nga Hungaria stafetën e presidencës së radhës së BE-së, ka vendosur të mos e ftojë ambasadorin hungarez në ceremoninë e nisjes së kryesimit polak që mbahet sot. Arsyeja e një lëvizjeje të tillë befasuese u tha se është fakti që Budapesti i dha azil politik një ish-zëvendësministri polak i cili po hetohet për shpërdorim të fondeve publike. Ndërkohë, as vetë kryeministri i Hungarisë Viktor Orban, nuk është ftuar në eventin që mbahet në Varshavë. Polonia u shfaq tejet e zemëruar pasi Hungaria muajin e kaluar i dha azil politik Marcin Romanowskit, ish-zëvendësministrit polak të Drejtësisë. Romanowski, i cili mohon me forcë cdo akuzë, u la i lirë shpejt pasi presidenti i Asamblesë europiane për të drejtat e njeriut tha se ai kishte imunitet pasi ishte anëtar i këtij organizmi. Kryeministri polak, Donald Tusk, dhe presidenti i Këshillit Evropian, Antonio Costa, pritet të mbajnë fjalime në ceremoninë e inaugurimit të Presidencës gjashtëmujore të Polonisë në BE. Tusk ka qenë një kritik i Orbanit për qëndrimin e tij lidhur me luftën në Ukrainë, por edhe për politikat që Polonia i konsideron proruse. Orban nga ana e tij ka pohuar për mediat në Hungari se Qeveria e Tuskut i konsideron hungarezët armiq.