Vijon fluksi i udhëtarëve nga porti detar i Durrësit. Gjatë së dielës mbërritën në këtë port gjashtë tragete. Vetëm gjatë paradites së të dielës mësohet se mbërritën në portin tonë 4 tragete, 3 të nisur nga porti i Barit dhe 1 nga porti i Ankonës, duke sjellë në vend përmes kësaj pike kufitare 4550 udhëtarë. Po ashtu gjatë mbrëmjes së të dielës mbërritën edhe 2 tragete të tjerë nga porti i Barit që sollën edhe 3 mijë pasagjerë të tjerë, kryesisht emigrantë dhe turistë të huaj që vijnë për pushime në Shqipëri. Autoritetet bëjnë me dije se në vendkalimin kufitar të Durrësit po punohet me kapacitet të plotë për të përballuar fluksin. Po sipas burimeve pranë portit i njëjti fluks i shtuar pritet të vijojë edhe përgjatë muajit gusht. Fluksi i udhëtarëve dhe turistëve duhet të shoqërohet me shërbim të shpejtë dhe mirësjellje nga ana e policëve. Ky ishte apeli që ministri i Brendshëm përcolli gjatë një vizite në pikën kufitare të Kapshticës.