Pas kërcënimit të Trump për të marrë Kanalin e Panamasë, zbulohet udhëtimi i parë i Sekretarit të Shtetit jashtë SHBA-së 23/01 18:19
Qindra sirianë që jetojnë në Athinë u mblodhën pasditen e së dielës në sheshin Syntagma para parlamentit për të festuar rënien e regjimit të Asadit.
Duke mbajtur flamuj me ngjyrat e revolucionit ,por edhe flamujt e Palestinës disa prej tyre, ata hidhnin parulla përkrahje për rebelët që morën Damaskun dhe qytetet e tjera.
Shumica e demonstruesve ishin burra ,por kishte të pranishme edhe disa gra me shami në kokë. Ndërkohë , makinat me flamujt e revolucionit sirian lëviznin rreth sheshit Sintagma, duke i rënë borive.
Më herët flamuri i opozitës siriane është shpalosur mbi ndërtesën e ambasadës së Sirisë në Athinë, disa orë pasi rebelët e udhëhequr nga islamistët deklaruan se kishin marrë Damaskun, duke i dhënë fund sundimit të presidentit al-Assad.
“Diktatori u arratis, mbaroi. Duam apo s’duam duhet të shikojmë përpara për të ardhmen e këtij vendi”, thotë Maarouf Alompeint, kardiolog sirian që jeton në Greqi.
“24 milionë sirianë sot, nuk kemi fjetur gjithë natën. Prisnim momentin kur diktatori i madh do të largohej.”, thotë Nader Halbouni, sirian që jeton në Greqi.
Ndërkohë Greqia ndjek me vëmendje të veçantë zhvillimet në Siri pasi përreth Alepos jeton një komunitet i madh prej 5000 grekësh ortodoksë dhe 8500 greqishtfolës myslimanë.
Edhe pse në Damask ka një klimë euforie, ambasadori grek në Siri, Nikolaos Protonotarios, raporton se që nga hyrja e rebelëve në qytet, të shtënat dhe plaçkitjet e ndërtesave ,mes tyre edhe ambasadave e dyqaneve, nuk kanë të ndalur.
Ai ka deklaruar se do të largohet nga Damasku në orët e ardhshme bashkë me diplomatë të shteteve të tjera , duke shtuar se nuk ka pasur deri tani asnjë kërkesë nga grekët sirianë për riatdhesim.
Top Channel
